असे कसे घडायचे

गुलाब ही रुसायचे असे कसे घडायचे

तुझ्याविना झुरायचे असे कसे घडायचे

तुझीच हाक गुंजते क्षणोक्षणी जिथे तिथे

तुझेच भास व्हायचे असे कसे घडायचे

युगे युगे मनात मी तुलाच पूजतो सखी

तुला न ते कळायचे असे कसे घडायचे

तुझीच प्रीत कालची तुला न आठवे गडे

छळून तू हसायचे असे कसे घडायचे

तुफान वादळात तू घनात पावसात तू

तुझ्यासवे भिजायचे असे कसे घडायचे

रणांगणात युद्ध मी तुझ्यामुळेच टाळले

अता मला हरायचे असे कसे घडायचे

तुझेच गीत गायचे तुझ्यात धुंद व्हायचे

उन्हातही फुलायचे असे कसे घडायचे

जगातली सुखे सखी तुझ्या मिठी पुढे फिकी

मला मिठीत यायचे असे कसे घडायचे

पहाटच्या धुक्यात मी तुलाच शोधतो सखी

दुरून तू पळायचे असे कसे घडायचे