आयुष्याचे गणित

आयुष्याचे गणित सोडवूया

राग द्वेषाला शून्याने गुणूया

पाटीवर येता निर्विचाराचे शुन्य

सुहास्य जीवनी फुलवूया

दुःखाची वजाबाकी करून

नैराश्याशी कट्टीच घेऊया

आनंदाची बेरीज करत जाता

समाधानाचा गुणाकार करूया

हस्यरंगी कुणा रंगविणे

नफा मोठा समजूया

तोट्याचा विचार नात्यात

जरा खुंटीला टांगूया

आनंदाचे सुंदर कारंजे

हेच सूत्र अन समीकरण

मदतभावनेचा करून वर्ग

समाजोपयोगी ठेवू आचरण

भूमिती सोपी करू छान

स्नेहाचा परीघ वाढवूया

कोनांचा अभ्यास करून

विशाल दृष्टिकोन ठेवूया