सोनपाऊली आली दिवाळी

नक्षत्रांचे लक्षदीप उजळीत

सोनपाऊली आली दिवाळी

दवबिंदूंचे हे माणिक पैंजण

गाती पहाटेस अमरभूपाळी

सुर्यकिरणांची ही चैतन्यदायी 

प्रसन्न मंगलदायक सुरावट

पुलकित करते तनामनाला

ओसंडतात आनंदाचे मधुघट

समीराच्या मोहक नृत्यातून

पसरतात मधुर सनईचे सूर

अश्विनाच्या या रमणीयतेत

शाल धुक्याची दिसे दूर दूर

सोनपिवळा गेंदेदार झेंडू

सज्ज झाला बांधून तोरण

सोनेरी सुखाच्या या ओंब्या

सरसावतात देण्या मधुक्षण