വായിച്ചു വളരാം..രചന :-ബിനു.R

വായിച്ചു വളരാം സൗഹൃദങ്ങളെ 

വായനയിൽ നൽചിന്തകൾ

തെളിഞ്ഞുണരണം 

വായന തന്നെ അഭികാമ്യമെന്നു

ചൊന്നീടുന്നൂ,

വായനയിൽ ലോകനന്മകൾ

അറിഞ്ഞീടാൻ. 

കാലത്തെക്കുറിച്ചു പറഞ്ഞ-

വരുടെ സുമങ്ങളും 

കാലത്തെ കാവ്യമാക്കി-

യവരുടെ ചിന്തകളും 

കാലത്തെ ജീവിതചര്യമാക്കി

യവരുടെ കുറിപ്പുകളും

കാവ്യകുസുമങ്ങളും

കല്പിതമാക്കുക മനതാരിൽ. 

തീരങ്ങളിൽ കഥ

മെനഞ്ഞവരുടേതും

തീരങ്ങളെ പ്രണയിച്ചവരുടേതും 

തീരങ്ങളിൽ ഒഴുകി-

യിറങ്ങിയവരുടെയും

തീരമായ് മാറി

ചിന്തിച്ചവരുടെയും

തീർത്ഥയാത്രകൾ

അറിയുക നാം. 

സ്വപ്നംനിറച്ച മാറാപ്പുക-

ളേന്തിയവരുടേതും

സ്വപ്നങ്ങളിൽ

അഭിരമിച്ചവരുടേതും 

സ്വപ്നങ്ങളിൽ കനച്ചു

കിടന്നവരുടേതും 

സ്വപ്‌നങ്ങൾ മാത്രം കൊണ്ടു

നടന്നവരുടേതും 

സ്വപ്നവിപഞ്ചികകൾ

അറിയുക നാം. 

യഥാർത്ഥത കണ്ടു

മടുത്തവരുടെയും 

യാഥാർത്ഥ്യമ്മാത്രം

സത്യമെന്നെഴുതി-

യവരുടെയും

യഥാർത്ഥത മാത്രം

കൊണ്ടുനടന്നവരുടേതും 

യഥാർത്ഥത മാത്രം

കണ്ടുനടന്നവരുടെയും 

യഥാർത്ഥത തിരിച്ചറിയുക നാം. 

ആത്മാവിലെല്ലാം

കണ്ടവരുടേതും

ആത്മാവും കൊണ്ടു

നടന്നവരുടേതും

ആത്മാവ് രചനകളിലൊളി-

പ്പിച്ചിരുന്നവരുടേതും 

ആത്മാവ് മാത്രമായ്

തീർന്നവരുടേതും

ആത്മാവിനൊളികൾ

കണ്ടെത്തുക നാം. 

വായനയാൽ പലതും

കണ്ടെത്തീടാം

വായനയാൽ പലതിലും

അഭിരമിച്ചീടാം

വായനയാൽ നല്ല

സ്വപ്‌നങ്ങൾ നെയ്തീടാം

വായനയാൽ ആകാശം

മുട്ടെ വളർന്നീടാം.