ರಕ್ಷಕ

ಬಿಸಿಲು ಮಳೆಗಂಜದೆ

ಹಗಲಿರುಳು ದುಡಿದು

ಬೆವರ ಹನಿ ಲೆಕ್ಕವಿಡದ

ಮನೆ ರಕ್ಷಕ *ನನ್ನ ಅಪ್ಪ*

ಅಮ್ಮ ಭೂಮಿ ಅಪ್ಪ ನಭ

ದೃಢ ಚಿತ್ತದ ಪ್ರತ್ಯಕ್ಷ ದೈವ

ನಡೆ ನುಡಿ ಕಲಿಸಿದ ಶಿಕ್ಷಕ

ನಾಡಿನ ಅನ್ನದಾತ *ನನ್ನ ಅಪ್ಪ* 

ಹೆಗಲ ಮೇಲೇರಿಸಿ ಕುಣಿಸಿ

ಕುದುರೆಯಾಗಿ ತಾನೆನ್ನ ನಲಿಸಿ

ನೋವು ನುಂಗುತ ಮೌನದಲಿ

ನಗುವ ವಿಷ ಕಂಠ *ನನ್ನ ಅಪ್ಪ* 

ಹುಟ್ಟು ಹಾಕುತ ಸಂಸಾರ ನೌಕೆಯನು

ದಡ ಸೇರಿಸುವ ಅಂಜದ ನಾವಿಕನು

ಸವೆಸುತ ಶ್ರೀಗಂಧದಂತೆ ತನ್ನನು

ಸಲಹುವನು ಸತಿಸುತರ *ನನ್ನ ಅಪ್ಪ*