ನನದೇನಿದೆ ...???

ನನದೇನಿದೆ ನೀ ಹೇಳಮ್ಮ

ನೀನಿತ್ತ ಭಿಕ್ಷೆಯು ನಾನಮ್ಮ            || ನನದೇನಿದೆ ||

ಜೀವವ ತುಂಬಿ ಧರೆಗಿತ್ತೆಯಮ್ಮ

ಹಾಲನು ಕುಡಿಸಿ ಬೆಳೆಸಿದೆಯಮ್ಮ

ತೂಗುತ ತೊಟ್ಟಿಲ ಪಾಡುತ ಲಾಲಿಯ

ಪ್ರೀತಿಸಿ ಅಪ್ಪುತ ಬೆಳೆಸಿದೆ ನೀನು         ‌‌   ‌‌‌  ||ನನದೇನಿದೆ||

ಜನನಿ ತಾನೇ ಮೊದಲ ಗುರುವು

ಕಲಿಸಿದೆ ನೀನು ನುಡಿಯಕ್ಕರವ,

ನಾನು ನನದೆಂಬ ಭ್ರಮೆಯನಳಿಸುತ

ಬದುಕಿನ ಹಾದಿಯ ತೋರಿದೆಯಮ್ಮ         || ನನದೇನಿದೆ ||

ಕತ್ತಲು ಬೆಳಕಿನ ಜೀವನದಾಟ

ಮುಳ್ಳಿನ ಹಾದಿಯ ಸಾವಿರ ಪಾಠ

ಕಲಿಸಿದೆ ಸಾಗಲು ಅಂಜದೆ ದೂರ

ಹರುಷದಿ ಎಳೆಯಲು ಬದುಕಿನ ತೇರಾ        ||ನನದೇನಿದೆ||