ಕಣ್ಣಿಗೆ ಕಾಣದ ಕೃತಿಕಾರ

ಕಣ್ಣಿಗೆ ಕಾಣದ ಓ ಕೃತಿಕಾರ

ನೇಸರ ಪಟದಲಿ ರಚಿಸಿದೆ ಚಿತ್ತಾರ

ಮೂಡಣದಿ ರಂಗಿನ ಕುಂಕುಮವಿಟ್ಟು

ಇಬ್ಬನಿ ಮಣಿಯ ಲತೆಯಲಿಟ್ಟು

ಭುವಿಯನು ಸಿಂಗರಿಸಿದ ಚಿತ್ರಕಾರ   ||ಕಣ್ಣಿಗೆ||

ನೀಲ ಗಗನಕೆ ನೀಲಾಂಬರವಿತ್ತು

ನಕ್ಷತ್ರ ಪುಂಜದ ರಂಗೋಲಿಯನಿಟ್ಟು

ಸೂರ್ಯ ಚಂದ್ರರಲಿ ಪ್ರಭೆಯನು ಇಟ್ಟು

ಧರೆಗೆ ಹಸಿರ ಸೀರೆಯನುಡಿಸಿ

ಬಿಡಿಸಿದೆ ರಂಗಿನ ಚಿತ್ರವ ಕಲೆಗಾರ    ||ಕಣ್ಣಿಗೆ||

ಹಾರಲು ಹಕ್ಕಿಗೆ ರೆಕ್ಕೆಯ ಕೊಟ್ಟು

ಕೋಗಿಲೆ ಕೊರಳಲಿ ರಾಗವನಿಟ್ಟು

ಹರಿವ ನದಿಯಲೆಯಲಿ ನಾದವನಿತ್ತು

ವಸುಧೆಯೊಡಲಲಿ ಜೀವರಾಶಿಯನಿತ್ತು

ಕಾಡು ಮೇಡು ಕಡಲ ಸೃಷ್ಟಿಸಿದ ಸೃಷ್ಟಿಕಾರ ||ಕಣ್ಣಿಗೆ||

ಕಾಣದ ಹಸ್ತದಿ ಕುಂಚವ ಪಿಡಿದು

ಮನುಜನ ಸೃಷ್ಟಿಸಿ ಕಳುಹಿದೆ ಧರೆಗೆ

ರಾಗಾನು ರಾಗದ ಬಯಕೆಯ ಬಿತ್ತಿ

ಕಲ್ಲುಮುಳ್ಳಿನ ಹಾದಿಯ ಕ್ರಮಿಸಲು

ಚಿತ್ತದಿ ಬಿಡಿಸು ಬೆಳಕಿನ ಓಂಕಾರ,

|| ಓ ಹರಿಕಾರ...ಕಣ್ಣಿಗೆ ಕಾಣದ ಕೃತಿಕಾರ||