ಕಾಡ್ಗಿಚ್ಚು

ಚಾಚುತ್ತಿದೆ...ಚಾಚುತ್ತಿದೆ....!

ಬೆಂಕಿಯ ಕೆನ್ನಾಲಿಗೆ ಚಾಚುತ್ತಿದೆ,

ಧಗ ಧಗನೆ ಹೊತ್ತಿ ಉರಿಯುತ್ತಿರುವ

ಬೇಗೆಯಲಿ ಎಲ್ಲವೂ ಕರಕಲಾಗುತ್ತಿದೆ!

ಯಾರೋ ಇಟ್ಟ ಕಿಡಿ ಇದಾಗಿದೆ,

ಅರಿವೇ ಇಲ್ಲದ ಮುಗ್ಧ ಬಲಿಯಾಗಿದೆ!

ಅಮಾಯಕತೆಗೆ ಕಾಯ್ವನಾವ ದೈವ ?

ಕಾಡ್ಗಿಚ್ಚು ಸಮಾನತೆಯ ತಾ ಕಾಯ್ದಿದೆ!

ಇಳೆಯೆಲ್ಲಾ ಹೊಗೆಯಲಿ ಮಂಕಾಗಿದೆ,

ಕರಿಬೂದಿಯ ರಾಶಿ ನೆಲವ ಮುಚ್ಚುತಿದೆ!

ಬೊಗಸೆ ರಕ್ಷಣೆ ಬೇಡಲು ಅಳಿದುಳಿದ ಜೀವ,

ಮೂಕಸಾಕ್ಷಿಯ ನೀಲನಭ ಕೆಂಪಾಯ್ತು ದಿಕ್ಕುಗಾಣದೆ!

ಚಮತ್ಕಾರದಿ ಎತ್ತಲಿಂದಲೋ ಬಿರುಗಾಳಿ ಬೀಸಿದೆ,

ಓ ಜೊತೆಗೇ ಜ್ವಾಲೆಯ ಕ್ರೋಧವೂ ಹೆಚ್ಚಾಗುತ್ತಿದೆ!

ಆದರೆ ಗಾಳಿ ತಾನೇ ಎಳೆದು ತಂದಂತೆ ಮೋಡವ,

ಕಾಯ್ವ ಪರಿಯಲಿ ಮುಗಿಲು ಮಳೆ ಕಣ್ಣೀರ ಸುರಿಸಿದೆ!

ಅಷ್ಟರಲ್ಲೇ ಜೀವ ಭಿಕ್ಷೆಯಲಿ ಅರೆ ಜೀವ ಸಿಲುಕಿದೆ,

ಇತ್ತ ಸಾಯಲೂ ಆಗದೆ; ಅತ್ತ ಬದುಕಲೂ ಆಗದೆ!

ತಡೆಯದಾಯ್ತು ಸ್ಮಶಾನದಲ್ಲಿ ಉಳಿದ ಮೌನವ,

ದೇವವಿತ್ತ ಏಕಾಂತ ಮರುಜನ್ಮವ ತಾನೀಗ ಶಪಿಸಿದೆ!