ಗೌರೀ ಗಣೇಶ
ಗೌರೀ ಗಣೇಶ
ಭಾದ್ರಪದ ಮಾಸ ಬಂದಿತು
ಇಳೆಗೆ ಹರುಷವ ತಂದಿತು
ಮಾತೆ ಗೌರಿಯು ಭುವಿಗಿಳಿದಳು
ಜೊತೆಗೆ ಮಗನ ಕರೆತಂದಳು
ಭುವಿಯು ಸಂಭ್ರಮ ಪಟ್ಟಿತು
ಜನಪದವು ಹಿರಿಹಿರಿ ಹಿಗ್ಗಿತು
ರೋಗಿ ರುಜಿನಗಳ ಮರೆತರು
ಮಾತಾ ಸುತರ ಸ್ವಾಗತಿಸಿದರು
ಹಸಿರು ತೋರಣಗಳು ನಲಿದವು
ಹೂವು ಹಣ್ಗಳು ಮೆರೆದವು
ಮನೆ ಮನೆಯ ಮಂಟಪದೊಳು
ಮಂಡಿಸಿದರು ಸಂಭ್ರಮದೊಳು
ಮಾತಾಸುತರನು ಪೂಜಿಸಿದರು
ಭಕ್ಷ್ಯಭೋಜ್ಯಗಳನರ್ಪಿಸಿದರು
ಶ್ರೀ ಸ್ವರ್ಣ ಗೌರೀ ಗಣನಾಥನ
ಭಕುತಿಯೊಳು ನಡೆಯಿಸಿ ಪೂಜನ
ಮಾತಾ ಸುತರ ಪೂಜೆ ಮುಗಿಸುತ
ಹಲವು ವಿಧಗಳ ವರವ ಬೇಡುತ
ಬೀಳ್ಕೊಟ್ಟರು ಗೌರೀ ಗಣೇಶರ
ಬಾಗಿನ ತಾಂಬೂಲಗಳ ನೀಡುತಾ
ತವರು ಮನೆಯ ಮಡಿಲಕ್ಕಿ ಹಿಡಿದು
ಹೊರಟಳು ಹಿಮಗಿರಿಗೆ ಮಗನ ಕೈ ಪಿಡಿದು
ಮತ್ತೆ ಬಾ ತಾಯಿ ಮಗನೊಡನೆ
ಕಾಯುತಿಹುದು ತವರು ನಿನಗಾಗಿ