ಕಾಡುವ ಕನಸುಗಳು

ನಿದ್ದೆಯಲ್ಲಿ ಸುಸ್ವಪ್ನಗಳು ಕಾಡಿದಾಗ

ಆಹಾ ಹೃನ್ಮನಕೆ ಎಂತಾ ಆನಂದವು

ಜೀವನದಲ್ಲಿ ನಡೆಯದ ಘಟನೆಗಳ

 ಮಾಯಾಲೋಕಕ್ಕೆ ಕೊಂಡೊಯ್ಯುವವು

ಸುಡು ಬವಣೆಯ ಜೀವನದಲಿ ಬೆಂದ ಜೀವಕ್ಕೆ

ರಾತ್ರಿಯ ಹೊತ್ತು ಹಿತವಾಗಿ ನಿದ್ದೆ ಸೋಕಿದಾಗ

ಸುಸ್ವಪ್ನಗಳು ಪದೇ ಪದೇ ಕಾಡಿದಾಗ ಮುದವು

ಕಣ್ಣೀರಿನ ಬಾಳಿನಲೂ ನೋವ ಮರೆಸುವುದು

ಸುಸ್ವಪ್ನಗಳು ಕಾಡಬೇಕು ನವೋಲ್ಲಾಸ ತುಂಬಲು

ನೀರಸ ಬದುಕಿನಲ್ಲಿ ಬಣ್ಣದ ಚಿತ್ತಾರ ಮೂಡಿಸಲು 

ನಾಳೆಯ ಬದುಕಿನ ಭರವಸೆ, ಗೆಲ್ಲುವೆನೆಂಬ ಛಲಕೆ

ಕಾಡುವ ಒಳ್ಳೆಯ ಕನಸುಗಳು ಸ್ಪೂರ್ತಿದಾಯಕವು

ಕಾಡುವ ದುಸ್ವಪ್ನಗಳಿಗೆ ಮನವು ನೋಯುವುದು

ಹೃನ್ಮನಕೆ ಆತಂಕ, ದಿಗಿಲು, ಬೇಸರ ಮೂಡಿಸುವುದು

ನಾಳೆಯ ಬದುಕಿನಲ್ಲಿ ನಿರಾಸೆ, ಅತೃಪ್ತಿಯ ತರುವುದು

ಬಾಳಿನಲ್ಲಿ ಸಾಧನೆಯ ಹಾದಿಗೆ ಭಂಗವನು ತರುವುದು

ನಿದ್ದೆಯಲಿ ಎಂದಿಗೂ ನವಿರಾದ ಸ್ವಪ್ನಗಳು ಮೂಡಲಿ

ಕಾಡುವ ದುಸ್ವಪ್ನಗಳಿಗೆ ದೇವರ ಸ್ಮರಣೆಯೇ ಮಾರ್ಗ

ಸ್ವಪ್ನಗಳೆಂಬುದು ಸುಪ್ತ ಮನದೊಳಗಿನ ಅಭಿಲಾಷೆಯು

ಮನದಾಕಾಂಕ್ಷೆಗಳು ಕನಸುಗಳಾಗಿ ಮುದ ನೀಡುವುದು.