ಮೌನದಲ್ಲೇ ದೇವರಾಗು

ಬರಲಿ ಬಿಡು ಅವಮಾನ

ಮೌನದಲಿ ಸುಮ್ಮನಾಗು l

ದೂಷಣೆಗಳೆಷ್ಟೆ ಇರಲಿ

ಮೌನದಲ್ಲೇ ದೇವರಾಗು ll

ಚಿಂತಿಸದಿರು ಹುಟ್ಟುತನವ

ನಿನ್ನತನವೇ ಬೇರೆ ಇಹುದು l

ಆರಾಧಿಸುವ ಕಮಲವೂ

ಕೆಸರಿನೊಳಗಿನ ಕಸುವು ll

ಮುಕ್ತತನವೇ ವಿಶ್ವತನ

ಗೂಡಿನೊಳಗೇ ಸಾಯದಿರು l

ಒಮ್ಮೆ‌ರೆಕ್ಕೆ ಬಿಚ್ಚಿ ನೋಡು

ಆಗಸದ ಬಣ್ಣ ನೋಡು ll

ವಿಶ್ವವೈವಿಧ್ಯತೆಯ ನಾಡು

ಅದನರಿಯಲು ನೀನು l

ಗೂಡಬಿಟ್ಟು ಹಾರಬೇಕು

ರೆಕ್ಕೆಹರವ ಬಿಚ್ಚಬೇಕು ll

ಅರಿತುಬೆರೆತು ಹಾಡಿದಂತೆ

ಮೌನವೇ ಸಿಂಗಾರ ನೋಡು l

ಜ್ಞಾನವಂತನೊಮ್ಮೆ ನೋಡು

ಮಾತುಕತೆಯ ತೂಕ ನೋಡು ll

ಸಹಿಸಬೇಕು ಬದುಕಬೇಕು

ಎಷ್ಟೇ ನೋವು ಬಂದರೂನೂ l

ವಿಷಕಂಠನೇ ಆಗಬೇಕು

ದೇವರಾಗಿ ಬಿಡಬೇಕು ll