नेवरसा

पाय नेवरसा खुश हव गोलुआ बोले दांत चियारी के।

एक कट्ठा मोर बाबू के हव दू कट्ठा ससुरारी के।

चाल चलन में परिवर्तन ह बइठल गाल बजावेला।

सबही क औकात घूम घूम खड़े खड़े ऊ नापेला।

रजनीगंधा रगड़ के खाला चऊचक ठोंक सोपारी के।

मुंह लोक लोक बतियावेला ऊ सबही के धकियावेला।

बिन जरबन जंघिया पहिने क फयदा गजब गिनावेला।

कहे का दिक्कत हव बहनोई आवा राजा देवारी के।

अगुआई अब करे घूम घूम जइसे हव रोजगारी।

लईकी छांटे जईसे किनहा भंटा क तरकारी।

खुद बिना दांत क मसगूर लउके हंसला पर मेहरारू के।

एक कट्ठा मोर बाबू के हव दू कट्ठा ससुरारी के।