चुनावाँ दे मेले दा मज़ाक (पंचायत चुनावों पर हिमाचली व्यंग्य)
चुनावाँ दे मेले दा मज़ाक (पंचायत चुनावों पर हिमाचली व्यंग्य)
वोटां दे इस मेले जो लोकां
इक मजाक बनाईता।
मौज्जू लैणे आले बन्देयाँ,
सारे गराएँ च पड़थु पाईता।
वोटां दे इस मेले जो लोकां
इक मजाक बनाईता।
इक दुज्जे जो चुंग्गा लाई लाई
क्या क्या पुट्ठ कमाईता
भराए नै भरा लड़ाईता
कुथी त्रीमति नें खसम घुलाईता।
निंदिया चुगली करी करी नै
शरीकां च घोल पुआइता
वोटां दे इस मेले जो लोकां
इक मजाक बनाईता।
लोकां च तेरी तां होवा बड़ी ए
गरायें च तेरी लेहर बड़ी ए
दे दियाँ गल्लां करी करी ने
घरे परतु प्रधान खड़ाईता
अज्ज इस दा मौहल बणाईता
कल उस दा मौहल बणाईता
वोटां दे इस मेले जो लोकां
इक मजाक बनाईता
घरे घरे जाई करी फूकां दै दे
छोरुआं छोकरुआं दे कन्न भरादे
कदी इस जो ठूल्लु लाईता
तां कदी उस जो ठूल्लु लाईता।
समझ सयाणप जो करी दर किनार
नासमझां ते नॉमिनेशन भरवाईता।
वोटां दे इस मेले जो लोकां
इक मजाक बनाईता।
युवावां जो प्रधान बणाणा
सियाणेयां दा मंजा सरकाणा
पुटठे तोलके लाई मुंडेयाँ की
बचारे बुड्ढेयाँ जो खुड्डे लाइता
कुछ सोचया नी कुछ समझेया नी
चुनावाँ दा मकसद भुलाईता
वोटां दे इस मेले जो लोकां
इक मजाक बनाईता
खाणे पीणे आले बन्देयाँ खरी सांज पाईयो
सारे गरायें च इना बन्देयाँ बड़ी गांण पाइयो
जेड़ी सामी भारी टकरै उसीदा नारा लाईता
बोतल मुर्गे दे लोभे च आईने सारा पिंड नचाइता।
अज्ज इस दा बुआ खड़काइता ,
तां कल उस दा बुआ ठनकाईता।
वोटां दे इस मेले जो लोकां
इक मजाक बनाईता।
हल्ले भी समा है लोको
अपनी सयाणप बरतनेयो
सोची समझी वोट पानेयों
काबिल प्रधान चुणनेयों
समा गेया फिरी मत पछतांदे
कुसी दे जाले च आई पंचायती दा
मत बेड़ा गर्क करवांदे।
वक्त रहन्दे "सुरेश कौडलें" तुहांजो,
हाथ जोड़ी ने गलाइता।
वोटां दे इस मेले जो लोकां
इक मजाक बनाईता।
वोटां दे इस मेले जो लोकां
इक मजाक बनाईता।