વિધવા ભાગ-42 વિદેશ વિદાય
વિધવા ભાગ-42 વિદેશ વિદાય
સ્વામી ! તમે વિદેશ ભલે જાવ જો,
વિદેશમાંથી જલદી પાછા આવજો રે લોલ !
સ્વામી ! અમે જોશું તમારી વાટ જો,
લાંબો વિરહ તમે ન કરાવજો રે લોલ !
સ્વામી ! તમને કપાળે કરું તિલક જો,
પ્રભુજી આપે તમને સફળતા રે લોલ !
સ્વામી ! મેં તો તૈયારી સઘળી કરી જો,
જલદી જલદી ન નીકળતા રે લોલ !
સ્વામી ! વિદેશનું લાગે ન પાણી જો,
શરીરનું ઘ્યાન તમે રાખજો રે લોલ !
સ્વામી ! થાય હવામાનનો બદલો જો,
એના સામે તે ઝીક ઝીલજો રે લોલ !
સ્વામી ! તમારાં સપનાં સાકાર થાય જો,
સિદ્ધિઓ તમારા પગ ચૂમે રે લોલ !
સ્વામી ! મનમાં આવે આવો વિચાર જો,
મન મારું ઝૂમઝૂમ ઝૂમે રે લોલ !
સ્વામી ! બધે ચડતી તમારી થાય જો,
પડતી કોષો દૂર ભાગે રે લોલ !
સ્વામી ! આપણી વાડી લીલી થાય જો,
એ જ આશા ઉરથી જાગે રે લોલ !
સ્વામી ! તમે ધીમે ડગ માંડો જો,
શુકનનાં પાડજો પગલાં રે લોલ !
સ્વામી ! લીધું મનને મનાવી જો,
જલદી આવજો દેખાડી કલા રે લોલ !