વિધવા ભાગ-26 દિયરને
વિધવા ભાગ-26 દિયરને
નાના દેરીડા લાડકા, તું જાજે નિશાળે ભણવા રે,
ભણીને હોશિયાર થાજે રે !
જ્ઞાન દીપક છે જીવનનો, તું સાથ એનો લેજે રે,
સહારાથી આગળ જાજે રે !
ભાઈનો છે તું ભાગીદાર, આપજે કામમાં સાથ રે,
બોજને હળવો કરવા રે !
ભાઈઓ મળી ભેગા રે'જો, દેજો પરસ્પર સાથ રે,
સુખના કોઠાર ભરવા રે !
કુટુંબમાં તું છે નાનેરો, તેથી પામ્યો વધુ હેત રે,
એનાથી તું ફૂલાતો નહિ રે !
માબાપની આજ્ઞા પાળજે, ચૂકવવા એનું ઋણ રે,
એને તું ભૂલી જાતો નહિ રે !
નમ્રતા જીવનમાં રાખજે, કરજે આત્મસાત રે,
ગુસ્સાથી તો મન બગડે રે !
કૂપમંડૂક થાતો નહિ, મેળવજે અનુભવ રે,
ભમજે શહેર-વગડે રે !
પ્રભુજી તારી સાથે છે, સાથે સૌના આશીર્વાદ રે,
જગને તું સર કરીશ રે !
સૂર્ય-ચંદ્ર ઝાંખા લાગશે તારી પ્રતિભા આગળ રે,
ત્યારે તું મહાન બનીશ રે !
ભાભલડી તારી હરખે હું ગાઈશ તારાં ગીત રે,
ઓવારણાં તારાં લઈશ રે !
શિખરોને સર કરીને ઘેર જયારે તું આવીશ રે,
ત્યારે તને હું વધાવીશ રે !