વેદનાનો ઈલાજ કર

ઝખ્મી થઈ સંવેદનાઓ ભીતર, હવે સંવેદનાનો ઈલાજ કર,

વેદના આપી તો ભલે આપી, પણ હવે એ વેદનાનો ઈલાજ કર !

કાંટાથી નહિ, ફૂલોનાં મુલાયમ સ્પર્શથી ઘાયલ થયું છે હૃદય,

ને હવે તું કરી શકે તો, આ લા-ઈલાજ વેદનાનો ઈલાજ કર !

તે આકાશ છીનવી લીધું, હવે આઝાદીની વાત કરતા પહેલા,

જે પિંજરામાં કેદ છે ટહુકાઓ, એની વેદનાનો ઈલાજ કર !

પ્રથમ નજરે ઘાયલ કરી, દર્દની સોગાત આપી ગયા છે સનમ,

વણસી ગઈ જે, એ વ્હાલપમાં મળેલી વેદનાનો ઈલાજ કર !

મઝધારે મૂકીને માઝી ગૂમ થઈ ગયા છે કઈં યુગોથી જેના,

હવે તું નાખુદા બનીને, એ કશ્તીઓની વેદનાનો ઈલાજ કર !

મારા રૂદિયાના દરદે હંફાવ્યા છે કેટલાયે નામી હકીમોને,

તું પ્રેમી બની પારખી શકે વેદના, તો વેદનાનો ઈલાજ કર !

"પરમ" તારી રાહમાં ઉભી છું જન્મોથી કાળજું છેદાવી મારૂં,

"પાગલ" શ્યામ બની, એક જ ફૂંક માર ને વેદનાનો ઈલાજ કર !