તરુ આપણું સહિયારું

ડાળે બેસી પંખી ટહુક્યું

ધરતી તારી ગગન અમારું

પણ ભલું, તરુ આપણું સહિયારું,

ફરફર ફરકે પર્ણ સજીલાં

છેડંત અનિલ ગીત મજાંનાં

શોભે રતુંબલ લઈ હીંચોળાં

ભૂલશું કહેવાનું ભલા મારું તારું

મહાદાતા, તરુ આપણું સહિયારું,

અમ વનપંખીનો આશરો મોટો

બાંધ હવેલી, તું મળે ના જોટો

ભરી હરખ, ગૃહે સંતાનો પલશું

લીલુડું નવલું અનઘ રુપાળું

માવતર, તરુ આપણું સહિયારું,

ૠતુઋતુના કામણ ખીલતા

ખાટા મીઠા ફળોએ મ્હેંકતા

આવ નીરખ મંગલ રૂપાળું

અર્પે વિસામો કરુણાથી છલકતું

અન્નકૂટ, તરુ આપણું સહિયારું,

ગગન ગોખથી વહેતી ધારા

લીલાછમ હરખે ડુંગર ક્યારા

શોભંત વનમાળે રૂપલું સુંવાળું

સવાયા સંતસા ધરે નજરાણું

જગદાધાર, તરુ આપણું સહિયારું.