તો શું થયું
તો શું થયું
ચોપાસ ધૂમ્મસ છવાઇ છે, રસ્તાઓ ઓઝલ છે આંખોથી,
વાદળ મુસીબતનું મેઘલ! ઘેરાયું છે આજે, તો શું થયું !
ઘોર નિરાશાનો અંધારપટ ભિતર સુધી બેઠો છે કાળક પાથરીને,
આશાનું અણમોલ કિરણ છુપાયેલું છે આજે, તો શું થયું !
ક્યારેક અણધાર્યો વળાંક આવે, કે ચઢાણ કપરું પણ બની જાય,
જીવન સંઘર્ષ છે ! ચડતી - પડતી, તડકો - છાંયો આવ્યા કરે, તો શું થયું !
હું ન હારીશ કે ન થાકીશ, હૈયે હામ ને મૂખમાં રામ રહે સદા,
જીવન સંગ્રામ છે તો લડીશ હું યુદ્ધ ભલે ખુદથી જ હોય, તો શું થયું !
બસ કર્મ કર્યે જવું એટલું જ છે, સદાય કર્તવ્ય મારું,
પરિણામે થાય કે ન થાય સુખની સોનેરી સવાર, તો શું થયું !