તો ઘણું છે
તો ઘણું છે
અગાધ સાગર સમા માનવ મહેરામણ વચ્ચે,
પોતીકાપણાંનો આભાસ થાય તો ઘણું છે !
બે પળની આ મસ્ત ઉલ્લાસ ભરી જિંદગીમાં,
હસતાં હસતાં દુઃખ વિસરાય તો ઘણું છે !
"હું" શબ્દની આડમાં તો સૌ કોઈ જીવન જીવે,
"આપણું" કરી હળીમળીને જીવાય તો ઘણું છે !
જીવતાં સુખદુઃખમાં ભાગીદાર બની સૌ યાદ કરે,
મરણપર્યંત કોઈના મનમાં સ્થાન મળે તો ઘણું છે !
અદમ્ય મોજશોખ ખુદના આજીવન પોષવા કરતાં,
કોઈ મજબૂરની ઉદાસી દૂર થાય તો ઘણું છે !
ઈશ્વરની સુંદર સૃષ્ટિના અભિન્ન શાશ્વતભાગ રૂપે,
સત્કર્મોથી આગવું સ્થાન મેળવાય તો ઘણું છે !