સુમેળ

વર્ષાના વાદળ ને ધરાનો તો સદીઓથી દેખીતો પ્રેમ છે,

ક્ષિતિજે મિલનના મ્હોરામાં દેખાય છે એ તો ખોટો વહેમ છે !

આ વૃક્ષ તો સદા સદીઓથી ઊભાં એક સ્થિતપ્રજ્ઞની જેમ છે,

ને ખળખળ વહેતી નદીઓ તો અસ્તિત્વનો અફર નિયમ છે !

કોણ વિન્ધાશે અહીં પહેલા આસોપાલવ કે પછી ગલગોટો,

સદીઓથી બાગના માળીઓને તો આ બસ કર્મનો ખેલ છે !

ગળી જશે ગમમાં ગુલાબ ને ઓગળવું સાકરનું નિશ્ચિત છે,

ગુલકંદ તો એકબીજાની ઓળખ ખોવાય એવો એક મેળ છે !

ક્યાં ઘી ને ક્યાં કપાસ ને જુઓ કેવો સ્નેહનો 'પરમ' સુમેળ છે,

એક બની સાથે ઝળહળી ગયા જે પ્રગટ જ્યોતમાં 'પાગલ' છે !