સમજી-વિચારીને
સમજી-વિચારીને
સમયની ચાલને સમજી-વિચારીને ઉથાપીને;
હંમેશાં હાથ આવ્યું દૂર લાગે એ ઉપાસીને!
પછી તો લાગતું કે દર્દ મારું ખૂબ ઓછું છે -
ગળે શબ્દોના એકેએક ઘાવોને લગાવીને!
ગઝલનું પોત પ્રગટે માત્ર ને બસ માત્ર પોતીકું -
પીડાના અર્થ; સંવેદન અને ભાષાને પામીને!
કવિનો શબ્દ પ્રગટે ત્યારે ઝળહળ થાય છે સઘળું -
કપાળે મંત્રજાપો ને ઋચા સઘળું ઉગાડીને!
પુરાતન કાળથી શબ્દો ય ચાહે છે નવાં રૂપો -
નવી રીતો; નવા સંબંધ ને સંદર્ભ તાગીને!