સદા યુવાનીને જીવેલા : દિવ્યકાંત પટેલ

અલબેલી આલમના ધણી બનીને ફરે,

સાત દશકના યુવાન એવી કમાલ કરે;

કંટાળાનું નામોનિશાન નજરે ન ધરે,

સાત દશકના યુવાન એવી કમાલ કરે.

શિક્ષક હતા તો ખરું શિક્ષકત્વ દાખવ્યું,

મિનિટ પણ ન મોડા પડવાનું પ્રણ ભાખ્યું;

બાળકો સાથે જ્ઞાનની દુનિયામાં ફરે,

સાત દશકના યુવાન એવી કમાલ કરે.

સિક્કા એમની દુનિયાનાં અલંકાર,

ટપાલ ટિકિટોનો તેમનો ભર્યો ભંડાર;

ચલણીનોટોના આલ્બમ ઠાંસીને ભરે,

સાત દશકના યુવાન એવી કમાલ કરે.

વ્યૂકાર્ડ ને ગંજીપાનાના જોકરોય રાખે,

સામાન્ય જ્ઞાનની વાણી અવિરત ભાખે;

રેવન્યૂ સ્ટેમ્પનો આલ્બમ સૌ સામે ધરે,

સાત દશકના યુવાન એવી કમાલ કરે.

બાકસની છાપો ને બટનો અવનવા,

પથ્થરોના નમૂનાયે માંડે ભેગા કરવા;

સતત જાદુઈ જગતમાં મસ્તીથી વિહરે,

સાત દશકના યુવાન એવી કમાલ કરે.

છે કલમના કસબી કુતૂહલકાકા,

’નોલેજ’ની બાબતમાં ખૂબ છે પાકા;

અખબારી આલમમાં સદા સંચરે,

સાત દશકના યુવાન એવી કમાલ કરે.