દીકરી ઘરમાં ન હતી…!

લગ્નની તારીખ નક્કી થયાથી,

આજદિન સુધી દીકરીના પિતાએ,

નિરાંતનો શ્વાસ નથી લીધો.

 

કદાચ વિદાય વેળાએ,

પોતે પુરુષ હોવાથી;

હૈયાફાટ રૂદન પણ નથી કરી શક્યા.

 

કહેવાતો ‘શુભ’ પરંતુ વાસ્તવમાં,

એક દીકરીનાં પિતા માટેનો ‘દુ:ખદ’ પ્રસંગ;

હવે પૂરો થઈ ગયો હતો.

 

દીકરીની વસમી વિદાયની સાથે જ,

મેળાવડો વિખાઈ ગયો હતો ને-

ઘરમાં પણ સન્નાટો છવાઈ ગયો હતો.

 

રાત્રિની નીરવ શાંતિ હોવાછતાં,

થાકી ગયેલા પિતા પથારીમાં પડ્યા-પડ્યા;

ઓરડાંની લાઈટ સામે જોઈ જાગી રહ્યા હતા.

કારણ કે…

 

આજે ઓરડાંની એ લાઈટ બંધ કરી,

‘હવે સૂઈ જાવ, પપ્પા’ – કહેવાવાળી;

દીકરી ઘરમાં ન હતી…!