ખોટું કરતાં થોડું ડરવું…

ધન પાછળ દોડી શું કરવું ?

લાલચનું છે રૂપ જ વરવું.

 

આજ ભલે આ સળગે સૂરજ,

સાથ સમયની પડશે ઠરવું.

 

કોણ અમર છે આ ધરતી પર ?

અંતે એક દિન સૌને મરવું.

 

જીવન આપ્યું સેવા કરવા,

છોડો નાહક હરવું – ફરવું.

 

માયા-મમતા-મોહ ત્યજીને,

મસ્તક પ્રભુનાં ચરણે ધરવું.

 

સંત સમાગમ નિશદિન કરવો,

ભવસાગરમાં જો હો તરવું.

 

છેતરપિંડી છોડી દઇને,

સત્કર્મોનું ભાથું ભરવું.

 

'વીર' હૃદયની વાત ખરી છે,

ખોટું કરતાં થોડું ડરવું.