સરગમ ગણવા બેઠા

શ્વાસ નામની સિતાર લઈને સરગમ ગણવા બેઠા,

અમે મીરાંની કરતાલ લઈને ભક્તિ ભણવા બેઠા !

કેટલો બધો વિશ્વાસ હતો અમને પ્રભુ કૃપાનો,

અમે ઉછીનું અજવાળું લઈ અંધકાર હણવા બેઠા !

વાત ઈશ્વર ભજવાની હતી બસ એકતારો લઈને,

અમે નરસિંહના પદ લઈને શબ્દો વણવા બેઠા !

વાવ્યું હતું ક્યાં કશું ને અંતરમાં બીજ ઊગતા,

ધ્યાની બની ભીતર ઉગેલા હું ને લણવા બેઠા !

એ જ ભક્તિ, એ જ ભાવ ને દર્શનની ઝંખના એ જ,

અમે મણકાની માળા લઈને મંદિર ચણવા બેઠા !