સરદારનું ગીત-૪૮
સરદારનું ગીત-૪૮
યરવડામાં-૧ (ઈ.સ. ૧૯૩ર)
ગાંધીજીનો નશો ચડયો, પ્રજા ઘેલી બનેલ રે;
સરદાર અને કોંગી, આતુર થૈ’ ગયેલ રે.
ગાંધીને ન મળે માટે, ઘણાંને પકડેલ રે;
ને સરદાર માટે કૈં, બહાનું ન મળેલ રે.
વાટાઘાટે ચડે ખૂબ, ગાંધી ને સરકાર રે;
ગાંધીજીને કહે તેઓ, આપવા સહકાર રે.
વાઈસરોયની વાતે, જો સંતોષ ન થાય રે;
તો સવિનયનો જંગ, ફરી ચાલુ કરાય રે.
સરકારે લડાઈની, તૈયારીઓ કરેલ રે;
નેતાને પકડી લેવા, ખૂબ મંડી પડેલ રે.
પકડે જાન્યુ. ચોથીએ, ગાંધી ને સરદાર રે;
અનેકને કરી લીધા, આમ ગિરફતાર રે.
પજવવા બધી રીતે, પોલીસ થૈ’ કઠોર રે;
ને ગોળીબાર-લાઠીનો, છૂટો મૂકેલ દોર રે.
શાંતિને સ્થાપવા માટે, આવા યત્નો કરાય રે;
પરંતુ એમની આશા, ફળીભૂત ન થાય રે.
એમના જુલમો સામે, વધી ગયો વિરોધ રે;
ને સરકાર મંડાણી, વાળવા પ્રતિશોધ રે.
કોઈને કરતા નાગા, કો’ની મૂછો કઢાય રે;
લૂંટે મંગળસૂત્રોને, જે સૌભાગ્ય ગણાય રે.
ગાડી પાછળ બાંધીને, ઘણાંને ઘસડેલ રે;
એંશી વરસનાં ડોશી, જેલ ભેગાં કરેલ રે.
સરદાર અને ગાંધી, યરવડા રખાય રે;
એ સરદારને ખૂબ, મહત્ત્વનું ગણાય રે.
છોડી ચાને અહીં આવી, ભાતનો શોખ જાય રે;
ગુવાર શિંગનું શાક, ખાણ જેવું જણાય રે.
ગાંધીજીને રમૂજોનો, આપતા પકવાન રે;
ને સાથોસાથ તેઓની, સેવા કરે મહાન રે.
**
આમ યરવડા જેલે, સમય વીતતો થયો;
તેમાંય એકબીજાનો, પરિચય થતો ગયો.
(ક્રમશ:)