શ્રાવણની ભ્રાંતભક્તિ

આખ્ખો શ્રાવણ ધૂન ચાલે ॐ નમઃ શિવાય;

સોમરસનાં નામે પછી તો ભાંગ જ ભાંગ પીવાય.

સોમવારે ઉપવાસ ભલે નકોરડો કહેવાય;

એકટાણામાં આખેઆખી ફળબજાર ઠલવાય.

મંદિર બહાર ભૂખ્યા બાળક ટળવળતા દેખાય;

અંદર જો ને શિવલિંગ પર દૂધની ધારો થાય.

વદ આઠમના તહેવારે તો ઘર આખું હરખાય;

નાના મોટા સાગમટે સૌ જુગાર રમવા જાય.

 

મહિનો આખો ભ્રાંત-ભક્તિના બૂમ બરાડા થાય;

જોઈને આવા ખેલ ભક્તોના, ઈશ્વર પણ મુંઝાય.