ચાલ મેળાની મજા માણશું
ચાલ મેળાની મજા માણશું
ચાલ આજે મળશું, એકબીજાના સંગાથે મેળામાં મહાલશું,
હૈયાની વાતોની આપ લે કરશું, હાથમાં હાથ લઈ ચાલશું,
ચાલ મળીએ આજે પ્રકૃતિના સુંદર સાનિધ્યમાં,
આ કુદરતના સાનિધ્યમાં કુદરતના રંગોને આપણે માણશું,
જોઈ લઈએ આપણે જીવનના સપનાં સાથે મળી,
આ હૈયાના ઓરડાને પ્રેમની વાતોથી આપણે સજાવશું,
ચાલ મળીએ પેલી કોયલને આપણે ગીત મધુરા શીખવા,
સાથે મળીને આપણે પણ જીવનના ગીતો ગાઈશું,
આ દરિયાની રેત પર ચાલ ઘર એક સુંદર બનાવીએ,
એ ઘરમાં બંને સાથે મળી પગલાં આપણે પાડશું,
ચાલ સાથે મળી આ શમણાંઓ સજાવીએ,
આ શમણાંઓમાં સાથે મળીને રંગ આપણે ભરશું,
તારા હૈયે પ્રીત એ જ મારી મોટી જીત છે,
સાથે મળી આ જીતનો જશ્ન મનાવશું,
મળ્યું છે આ ઈશ્વરના આશીર્વાદ થકી આ જીવન,
ચાલ સાથે મળી ઈશ્વરનો આભાર આપણે માનશું,
ચાલ સાથે મળી મેળાની મજા માણશું,
એકબીજાને નજદીકથી આપણે જાણશું.