પૂરી થઈ આજે મારી બધી માંગણી

જાણે પૂરી થઈ ગઈ આજે બધી મારી માંગણી,

જાણે આ વર્ષા ભીના વાતાવરણમાં ભળી ગઈ તારી લાગણી,

ફૂલોની ખૂબસૂરત કેદમાંથી મુક્ત થઈ,

ફોરમ આવી લઈ તારા આગમનની વધામણી,

મોર બની થનગનાટ કરે આ મારું મનડું,

આ હૈયાના આંગણે થઈ પિયુની પધરામણી,

આ વહેતી હવા લાવી ખુશખબર તારા આગમનની,

હરખાઈ ગયું મન, ખીલી ઉઠયું બની એ પોયણી,

પંખીઓના ટહુકે તૃપ્ત થયું આ દિલનું વૃક્ષ,

હરખમાં સરકી ગઈ સર પરથી મારી ઓઢણી,

પુષ્પનો પમરાટ લાવ્યો દિલમાં નવો ઉમંગ,

જાણે ગઝલ માટે મળી ગઈ મને નવી જોડણી.