પ્રણયની વાત

સમયની નાવમાં બેસી પ્રણયની વાત કરવી છે,

હૃદયમાં સંઘરેલા એ સમયની વાત કરવી છે,

થયું તું આંગણું પાવન, જનમ તારો થવાથી ને,

હરખ ઘેલો બન્યો તો એ ઉદયની વાત કરવી છે,

સ્વભાવે તું ઘણી જિદ્દી, ગુસ્સામાં ના રહે પાછી,

છતાં છે મીણ જેવી એ હૃદયની વાત કરવી છે,

બનીને લાડકી સૌની, અપાવ્યું માન પણ ઝાઝું,

સમય સાથે રળ્યો તો એ વિનયની વાત કરવી છે,

બનીને સ્વપ્ન પપ્પાનું, સદા તું આંખમાં રમતી,

પરાજ્યમાં સદા પામી એ જયની વાત કરવી છે,

હૃદયનો સૂર તું છે ને, અમારી વાંસળી પણ તું,

ભલે 'ગોપી' બની છેડયો એ લયની વાત કરવી છે,

હૃદયના આભથી વરસે, સદાયે હેતની 'હેલી'

બની નિર્ભય તું થા તૈયાર, વિજયની વાત કરવી છે.