પ્રિયતમ

સખી મેં તો શણગાર્યું સ્વપ્નનું આકાશ

ને એમાં લીધી પ્રીતમ સંગ ઉડવાની મોકળાશ

સખી મેં તો શણગાર્યું સ્વપ્નનું આકાશ

સાંજની સોડ્યમાં કેસરિયા કંથની ઉતારું આરતી

રાત વીતે રાતરાણી શી મ્હોરતી 

ને પરોઢિયે પાથરું મ્હારા ઓરતાનો અજવાસ

સખી મેં તો શણગાર્યું સ્વપ્નનું આકાશ

ઉંબરે ઉભી લઉં એનાં આગમનનાં ઓવારણાં

ને ઉદાસીન મલકાટ સજાવી વાસુ અધરનાં બારણાં

પણ વિરહ સંકોરતી આ વેળામાં તું જ કે'

ક્યાં સંતાડું આંખ્યુંની ખારાશ ?

સખી મેં તો શણગાર્યું સ્વપ્નાં નું આકાશ.