પ્રેમથી પાગલ
પ્રેમથી પાગલ
રાખ થાય સઘળું એ પહેલાં તું થોડું થોડું ફરવાનું રાખ,
ચાર દીવાલો વચ્ચેથી થોડું રોજ બહાર નીકળવાનું રાખ !
ભીતરનું પંખી પાંખો ફફડાવીને તરફડીને તડપે એ પહેલાં,
પિંજરને તોડીને ખુલ્લા આકાશમાં મુક્ત થઈ ઉડવાનું રાખ !
આ જ લાકડામાં થશે ખાખ, ખુમારી ને ખેલદિલી બધી અહીંજ,
તેથી હર એક પળને સૌ સાથે વહેંચીને વ્હાલથી જીવવાનું રાખ !
હાથમાંથી સરકે રેત ઝડપી એમ સરકી રહ્યો જોને સમય આ,
રોજ નવું જીવન સમજી સમય સાથે કદમ મિલાવવાનું રાખ !
ઝાકળ,ઝાંઝવા ને મૃગજળની અટકળ જેવી આ ફાની દુનિયા,
હમણાં વરસતો હોય વરસાદ તો હમણાંજ પલળવાનું રાખ !
"પરમ" તો આ રહ્યો ઉપલબ્ધ સદા તારી આસપાસ ચારેકોર,
તુય મારી જેમ જ પ્રત્યેક પલમાં પ્રેમથી "પાગલ" થવાનું રાખ !