પારખાં

અસલ-નકલના ભેદ,

પરીક્ષાથી પરખાતાં;

છે ગુણ પ્રકાર અનેક,

કસોટીથી સમજાતાં.

અસલ-નકલના ભેદ,

પરીક્ષાથી...

હેમ, હૈયાં 'ને ,હથિયાર,

પારખાં પહેલાં થાતાં;

એ સહુ, કેવાં પાણીદાર,

 પરીક્ષાથી પરખાતાં;

અસલ-નકલના ભેદ,

પરીક્ષાથી...

સાચાં- ખોટાંનાં, અનુમાન,

 કસોટી કરતાં થાતાં;

આ અવનિમાં અંદાજ,

પરીક્ષાથી પરખાતાં;

અસલ-નકલના ભેદ,

પરીક્ષાથી...

જ્યાં વાદ અનેક, વિવાદ,

 મતાંતર ઝાઝાં થાતાં;

 આધાર અને નિરાધાર,

પરીક્ષાથી પરખાતાં;

અસલ-નકલના ભેદ,

પરીક્ષાથી...

કોઈ દિલનાં, દાવેદાર,

ભેદ એનાય મપાતાં;

 છે ઉપર કે, આરપાર,

 પરીક્ષાથી પરખાતાં;

અસલ-નકલના ભેદ,

પરીક્ષાથી...

છે જૂની, જગતની રીત,

અવર પોતાનાં થાતાં;

આ "પ્રેમ" કહેવો, કે વ્હેમ !

પરીક્ષાથી પરખાતાં;

અસલ-નકલના ભેદ,

પરીક્ષાથી.