ઓ હિંદ

ઝૂરી ઝૂરી હવે ક્યાં સુધી જોવું ?

ઓ હિંદ ! તારું અહીં દુઃખ શુ રોવું ?

કળિમાં ખવાઈ તું શૂરવીર જાયી,

ઝરપે જખમ તેમાં તુ આ તણાઈ!

ઊંચ કુલીન તારું નૂર અમીરી,

રે શું ધર્યો હવે હાલ ફકીરી ?

લમણે તું હાથ રે મૂકી શું ઝૂરે ?

હાલ આ તારો હૃદય મુજ ચૂરે !

દુઃખનું છવાયું છે વાદળ માથે,

રે કોણ હાથ ધરી રહે સાથે ?

કોણ ઉધ્ધારે રે કોણ ઉગારે ?

આ દુઃખસાગરથી કોણ તારે ?

આજ શૃંગાર સૌ તુજથી વછૂટ્યો,

પૂર્ણ વૈરાગ્ય નિરાશે શુ ચૂંટ્યો ?

રસ આઠે તારા ગયા કહીં ઊડી ?

સર્વ છબી કરુણા મહીં બૂડી !

બહુ બહુ રે રહી રાત અંધારી !

ઓ ઈશ ! ક્યાં છે અરુણની બારી ?

અદલ પ્રભુ ! આ સમાધિ મુકાવો !

કે મુજ હિંદ લે શુભ દિન લહાવો !