નાનાં બાળકનાં મનમાં અનેક સવાલો
નાનાં બાળકનાં મનમાં અનેક સવાલો
બાળક: હે માત !
અંધારી આ રાત,
આકાશમાં તારા કેટલાં હજાર ?
ગણું ત્યારે ભૂલું હું વારંવાર !
માતા: હે બાળ, મારાં ભોળુંડા,
પ્રકાશ તણાં આ અસંખ્ય ટુકડા,
ગણવાની તું તેને કોશિશ ન કર,
બસ એને દેખીને તારું મનડું ભર,
બાળક: હે મારી માત !
મારે પૂછવી તને એક વાત !
ચાંદો સવારે ક્યાં સંતાય ?
રાત્રે સૂર્ય શું તેનાં ઘરે સૂવા જાય ?
માતા: બાલુડા મારાં !
મૂંઝવે પ્રશ્નો તારાં !
સાંભળ કહું તને એક વાતલડી,
ચાંદ વિના સૂની રે રાતલડી,
સૂર્ય અને ચંદ્ર પડ્યા એક વેળા બાખડી,
તેથી ન મળતાં તેઓ એક પણ ઘડી,
આકાશમાં એક વેળા એકનું જ રહે રાજ,
બંને જણા વારંવાર એ પહેરાવે ધરતીને તાજ,
બાળક : સરિતાઓ મળી સાગરમાં,
તોય તેનું કેમ ખારું પાણી ?
પર્વતો ઊંચા કેમ ?
વૃક્ષો વરસાદને શી રીતે લાવે તાણી ?
માતા: પર્વતો ઊંચા તેનું કારણ ?
હા ! દૂધ પીવાની પીવામાં તારા જેમ ન કરતા આનાકાની,
સાગરમાં મળી સરિતાઓ તે છતાં કેમ ખારો ?
તો સાંભળ,
ઘંટી ફરે તેમાં મીઠાની, તે કહાની સૌએ જાણી,
વૃક્ષો છે ઈશ્વરના દૂત,
તેથી તે વરસાદને લાવે તાણી !