મુગ્ધાવસ્થાનું ગીત
મુગ્ધાવસ્થાનું ગીત
મોસમની મઘમઘતી કેડીએ, આંબાની મંજરીનું ફૂટવું
વાસંતી વાયરાનો હાથ ઝાલીને, પ્રણયનું આયખામાં મ્હોરવું
સખી ! આવું તે કોને જઈ કહેવું ?
પ્રેમનાં પગથારે પહેલો પગ પાડ્યો
જાણે લીલા ખેતરમાં ઊભો ચાડીયો !
ચોરે ને ચૌટે એની ચર્ચા ફેલાણી
ઘેલી છોરી થઈ છે જુઓ ફલાણી
આંગળીનું દાંત વચ્ચે રાખી મલકવું
ન્હોતી ખબર યૌવન ફૂગ્ગાનું ફૂટવું...સખી !
ટપ-ટપ આભમાંથી ટીપાંનું પડવું
ને શમણાંનું વરસાદી રંગે રંગાવું
સૂકી ધરામાં વળી તરણાંનું ફૂટવું
ભીની-ભીની માટીનું કેવું મ્હેકવું
રુદિયાના આસમાને મેઘધનુ ઊગવું
યૌવનનું સોળ કળાએ જઈ ખીલવું...સખી !