મિલનની આશા

જેવી રીતે નદી સાગરને મળવા બધા જ,

અવરોધ પાર કરીને આવે છે,

આપણું મિલન પણ કદાચ એવું જ હોય,

જ્યારે પણ મળીએ એકબીજામાં ભળી જઈએ.

જેવી રીતે ધરતી બધા જ બંધન તોડી,

આકાશને ક્ષિતિજ રૂપે મળે છે,

આપણું મિલન પણ કદાચ એવું જ હોય,

જ્યારે પણ મળીએ એક થઈ જઈએ.

જેવી રીતે ચાંદની ચાંદને મળવા માટે,

પોતે વિખરાઈ જાય છે,

આપણું મિલન પણ કદાચ એવું જ હોય,

જ્યારે પણ મળીએ એકબીજાથી જોડાયેલા રહીએ.

જેવી રીતે વરસાદ ધરતીની તરસ છીપાવવા,

પોતાનું મન મૂકીને વરસે છે,

આપણું મિલન પણ કદાચ એવું જ હોય,

જ્યારે પણ મળીએ મન મૂકીને વરસીયે.

આમ તો કહેવાય છે નદીના કિનારા ક્યારેય નથી મળતા,

આપણે બન્ને પણ એવા જ છીએ કદાચ પણ,

જેવી રીતે નદીના બે કિનારા મિલનની,

પરિભાષા બદલીને મળે છે,

આપણું મિલન પણ કદાચ એવું જ હોય,

જ્યારે પણ મળીએ પાસે ભલે ના હોય,

સાથે હંમેશા માટે ચાલીએ.