મારે ઉડાડવો રે પતંગ

રંગબેરંગી ફૂલો આજ ખીલ્યાં આકાશમાં

આવ્યો ઉતરાયણનો અવસર રે !

આભમાં ઉડાડવો મારે પતંગ રે !

હૈયે ઉમંગ ને મનગમતો સંગ લઈ,

સ્નેહના તાંતણે બાંધી લઉં દોર રે.

વ્હાલમની ફિરકીમાં ઉકેલી હું ગૂંચો,

મારી લઉં થોડો ડીજે પર ઠુમકો રે.

લાડુ,ચીકીની મીઠાશ ને ઊંધિયાનું શાક લઈ,

આભમાં ઉડાડવો મારે પતંગ રે.

ધાબા ઉપર કરીને કબજો

વાયરાને કરું લાખ અરજો.

આભમાં ઉડાડવો મારે પતંગ રે.

ષડરિપુ ભલે આવી પડે જોશમાં

ઝોલ નાખીશું ને થોડું ખેંચીને હાથોના કસબથી

જોડાજોડ કરીશું આજ એનો સામનો રે,

આભમાં ઉડાડવો મારે પતંગ રે.

પાડીશું ભેળાં દોર કાપ્યા ની બૂમો રે.

કરવું આજ નભ ઉપર રાજ રે.

આભમાં ઉડાડવો મારે પતંગ રે.

પ્રેમી તરંગ થકી કંડીલ મોકલશું,

બે ઘડી તારલિયા જેમ ચમક્યાનો ને

નિજ સ્વપ્નાં પ્રભુને સમર્પિત કર્યા ના,

આનંદ ની અનુભૂતિ લઈશું રે.

આજે.. આભમાં ઉડાડવો મારે પતંગ રે..