મા

ચર્મના જોડાં કરું, ઋણ તોય ના ઉતરે કદી મા,

શિર નમાવી સાચવું, ઋણ તોય ના ઉતરે કદી મા.

દૂધની ધારા વહે છે, મમ સકલ અંગો મહીં મા,

રક્તનું સિંચન ધરું, ઋણ તોય ના ઉતરે કદી મા.

લાગણીનો ઘૂઘવે દરિયો સતત દિન-રાત તારો,

ભાવથી પૂજન રચું, ઋણ તોય ના ઉતરે કદી મા.

દેવ તું,ભગવાન તું, પૂજા કરું દિલથી છતાંપણ,

હાથ જોડીને નમું, ઋણ તોય ના ઉતરે કદી મા.

દૂધથી પોષણ કર્યું તે હાડ ગાળી જિંદગીનું,

આયખું આખું ખમું, ઋણ તોય ના ઉતરે કદી મા.

પાર તારો ના કદી પામી શકું હું જિંદગીભર,

સાધના કરતાં તપું, ઋણ તોય ના ઉતરે કદી મા.

ધૂળ છું તારા ચરણની, રાગ તારો ગાઉં પ્રેમે,

પ્રેમ આગળ આથડું, ઋણ તોય ના ઉતરે કદી મા.