લખવા દે

દુભાતા દિલની વાતોને અહીં લખવા દે ને !

પડેલી દિલમાં ફાટોને અહીં લખવા દે ને !

બધું છૂટી ગયું યાદી બની ગઇ છે છતાં,

ગયા તૂટી એ ભાગોને અહીં લખવા દે ને!

ભ્રમરને પણ એ ભીડાવે ભલે કોમળ ઘણાં !

કમળ ફૂલોની જાતોને અહીં લખવા દે ને !

કરે છે વાત મક્કમતા ભરેલી એ સદા,

સજળ દેખાય આંખોને અહીં લખવા દે ને !

પહેરી મુખ ઉપર મ્હોરું મને સામે મળે,

બતાવે ના એ ગાંઠોને અહીં લખવા દે ને !

સમય સરકી ગયો ને લઈ ગયો આશા બધી,

નિરાશાના એ શ્વાસોને અહીં લખવા દે ને !