લીમડો ને પીપળો
લીમડો ને પીપળો
લીમડો ને પીપળો એક સાથે હવામાં ઝૂલે છે,
લીમડાની ડાળી આજે પીપળા પર ઝૂકેલી છે !
પીપળો સ્મિત વેરાવી લીમડાને આજે ભેટે છે !
પાડોશી છે બંને એક ગલીનાં એક ફળીનાં,
અષાઢી બીજમાં લીલાછમ થઈ સંગીત વેરે છે,
વર્ષાનાં થનગનાટમાં ડાળી ડાળીઓ નૃત્ય કરે છે !
પાનખરનાં ખરી ગયેલા પાનની ડાળીમાં,
આજ નવી કુંપણો ફૂટે છે,
આનંદમાં મદમસ્ત થઈ,
આજ લીમડો ને પીપળો હવામાં ઝૂલે છે !
લીમડાની ઝૂકેલી ડાળીઓ પર ખિસકોલી રમતો માંડે છે !
પીપળાનાં પાન તે દ્રશ્ય જોઈ થોડા શરમાય છે,
કોયલ, મેના, પોપટના સંગીત પણ કાનોમાં ગુંજે છે,
ગગન આખું ને વાદળા આજે વરસાદ નિચોવે છે !
સઘળાં પર્ણોએ નવી લીલુડી સજાવટ કરી છે આજે દેહમાં,
ને આજ ધરતી પણ તેની સાથે બોલે છે !
ઠરી ગઈ આજે ભડભડતી બપોરની કાયા એની,
વરસાદથી ભીંજાઈને એક એક કણ આજે સજીવન થઈ બોલે છે !