કોણે કરી ?

સુંદર આ દુનિયાને સુંદર અહીંની સૃષ્ટિ;

રંગોને જોવાની હામ મારી આંખોમાં કોણે ભરી ?

કાળી કોયલના ટહુકામાં મીઠાશ કોણે ભરી ?

પેલા મોરલાના પીંછામાં કરામત કોણે કરી ?

આંબાના મ્હોરમાં આવી ગઈ મંજરી;

મઘમઘતા પેલા ફૂલમાં ફોરમ કોણે ભરી ?

કાગડાને કબૂતરનાં આમ તેમ ડાળખાં;

પેલી સુગરીમાં એવી આવડત કોણે ભરી ?

ઘૂઘવતા દરિયામાં પાણીનો નહીં કઈં પાર;

ઊંચે પેલી વાદળીઓને પાણીથી કોણે ભરી ?

હું તો પૂછું આ સઘળી બનાવટ કોણે કરી ?

અચરજ જેવી આ કરામત કોણે કરી ?

કોણે કરી ?