કાગળ અને કલમ
કાગળ અને કલમ
મને એક સંબંધ અતૂટ ક્યાંક,
કાગળ અને કલમ જેવો મળે,
એ જ સંબંધ અચૂક ક્યાંક,
આગળ સાધુ અને ચલમ જેવો નિકળે !
તડપ ઝખ્મ ઝખ્મ થઈને ઝંખે,
એક કાગળ શબ્દોનો સ્નેહ,
ને કલમની શાહીમાંથી પ્રવાહ,
પ્રેમનો પછી મલમ જેવો નીકળે !
ભીના ભીના શબ્દો થકી લીંપાઈ જાય,
કોરો દેહ આખા કાગળનો,
પછી તો ગંગા જમના બનીને,
કલમના આંસુઓનો મરમ નીકળે !
થીજી ગયેલા અરમાનો થઈ ગયા છે,
આત્મસાત કાગળના રૂદિયે,
પછી તો લોહીઝાણ કલમની લાગણીઓ,
બની લાવા ગરમ નીકળે !
એક સખશિયત પીગળી રહી,
કવિમાં આખી કલમ લઈ હાથમાં,
પછી તો ઝીલવા કવિને,આતુર
કાગળમાંથી પણ દરદ નીકળે !
શાહી કલમની શબ્દો બની ભાવથી,
ભેટી પડે છે કાગળને જ્યારે,
ત્યારે કર લંબાવે સાવ કોરો કાગળ,
ને એક અદ્રશ્ય ધરમ નીકળે !
ને વિશાળતા વ્હાલપની તો પછી,
એમ વિસ્તરે કાગળના આંગણામાં,
કે જે કલમ લખે એ બે શબ્દો વચ્ચેથી,
આખું નિઃશબ્દ ગગન નીકળે !
અરે ઓ ખુદા તારી ભાળ મેળવવા,
થાક્યો મંદિર મસ્જિદ જઈ,
શબ્દ સાધ્ય,કલમ સાધન,
ને કાગળમાં જ દૈર-ઓ-હરમ નીકળે.
જાત ચીતરવામાં કાગળ પર,
"પરમ" આખી જિંદગી ખર્ચાઈ ગઈ,
જન્મ જન્મ ચાહું કે મારી કલમમાંથી,
આવા "પાગલ" કરમ નીકળે !