સફર

રસ્તા વગરની મંઝીલની સફર તમે ખેડી શકો તો ચાલો,

અંતર આકાશે પંખીની જેમ એકલા ઉડી શકો તો ચાલો !

નથી રહ્યું કોઈ હમસફર, ન કોઈ સંઘ આ અજાણી રાહ પર,

બધું જ છોડીને અલગારી બની આગળ વધી શકો તો ચાલો !

એક અમૂલ્ય અવસર છે જીવન બસ ગાંઠ બાંધી લો મનમાં,

એક બીજ માફક મરીને પછી ખીલીને મહેકી શકો તો ચાલો !

વજૂદ સ્વનું થાય ભસ્મ એમ પ્રગટાવો એક લૌ અંતરમાં,

પછી એક અકંપ નિર્ધુમ જ્યોતિ જેમ ઝળહળી શકો તો ચાલો !

માની લીધું કે બહુ મુશ્કેલ છે, અસંભવ નથી આ સફર "પરમ" ની,

મારી માફક તમે પણ "પાગલ" થઈને પછી નીકળી શકો તો ચાલો !