જલતરંગ

અચાનક આ મનગમતો સ્પર્શ,

ખીલતા લાલ ગુલાબી ગાલ હું છું.

દોરાય અનેક મોહક મુસ્કાન,

અજાણી મસ્તીખોર વાછંટ હું છું !

સહુ કોઈને મુજની જ ચાહત,

હું નથી કોઇ ખીલતું ગુલાબ.

તમારું પારદર્શક મન હું છું,

ઉત્કટ ધસમસતો ધોધ હું છું !

ઈન્દ્રધનુષ અને નવી ઉમંગો,

મોજીલું નૃત્ય 'ને સપ્તરંગી સ્વપ્નો.

જન્મે નવી ઉભરતી નિર્દોષતા,

અણધારી વરસતી વષાૅ હું છું !

કંડારું અજાણ્યા માર્ગે નિજ રાહ,

મંદ મંદ હાસ્ય લપસતી જાઉં.

ન અટકું લક્ષ મળતાં પહેલાં,

નિર્મળ પૂજનીય નિઝૅરી હું છું !

ઝડપું કુદરતની સુંદરતા,

અંકુ હું માનસપટ પર તારા.

પ્રેરું હું નવી કળા ને જનમવા,

નિતાંત પાવન સરોવર હું છું !

મિલન ધરતી અને અમ્બરનું,

તોફાની અને અકલિત ખજાનો.

આપું તને તુજનું જ મનોબળ,

પ્રતિપળ બદલાતો સાગર હું છું !