જિંદગી
જિંદગી
પામવા જેવું બધું પામી જ લીધું જિંદગી.
એક ચપટી સુખ કદી ચાખી જ લીધું જિંદગી.
ચાહવા લાગી હવે હું જાતને મારી પછી,
હું સહારો ખુદનો છું ધારી જ લીધું જિંદગી.
કોઈ આપે દર્દ તો દુઃખી નહીં થાઉં કદી,
જો સદા મનને પછી વારી જ લીધું જિંદગી.
આપ તું પીડા ખુશી કે લાખ દર્દો શું થયું?
એક સરખું એ ગણી ચાહી જ લીધું જિંદગી.
આંગણું વાંકુ ભલેને હોય ના ફરિયાદ છે,
તેં નચાવ્યો નાચ તો નાચી જ લીધું જિંદગી.