ટપાલી

હર્ષ, શોક, આંસુ, ખુશી કેટલું થેલામાં ભરીને એ લાવે છે,

ટાઢ, તડકો, ગરમી, વરસાદમાં પણ ટપાલ લઈને એ આવે છે,

સાઇકલ પર છે સવારી એની ટ્રીન ટ્રીન ટોકરી વગાડે મધુરી ને,

પ્રિયતમાના હાથમાં ટપાલ આપીને હોઠ એ મલકાવે છે,

નેજવે હાથ ધરીને વાટ નિહાળતી માને ચરણ સ્પર્શ કરી,

ધીરેથી દીકરાનો પત્ર વાંચી ખુશીથી આંખ એ છલકાવે છે,

કોઈનો મેલો આવે તો મલાજો રાખી આપીને ચાલ્યો જાય,

સ્વજન નથી પણ સ્વજન બનીને સદા વાત એ સમજાવે છે,

કયાં રહ્યો હવે એ સમય અને મીઠો ઇન્તજાર દોસ્તો,

મોબાઈલ આવતાં ગઈ બધી આ મજા વાત એ સતાવે છે.