જીવન ઉદ્દેશ

શૂન્ય ને એક વચ્ચે જ એ કંઈ નથી સમાતી 

મારગ વચ્ચે પણ એ આમ તો ઘણું કમાતી 

જિંદગી કાંઈ મફતમાં એમ જ નથી પમાતી,

તારવવા સારને લડાવવો પડે વાજબી તર્ક 

વાતવાતમાં વચ્ચે લાવતા બને જિંદગી નર્ક 

ક્યારેક તો પછી વિવેકથી સમજવો પડે ફર્ક,

નિશ્ચિત તો કરવું જ પડે જિંદગીનું શું પ્રયોજન 

સમજ્યા પછી સુનિશ્ચિત કરવું પડે આયોજન 

એદી બન્યે તો મંઝિલ કાયમ દૂર રહે જોજન,

કોશિશ કરવી એ કંઈ ખોટું નથી બને બધું પૂર્ણ 

અંધ બનીને મથ્યા જ કરીએ તો થઈ જાય ચૂર્ણ 

જરૂરી હોય છે ખુશ રહેવા ક્યારેક રહેવું અપૂર્ણ,

જ્ઞાનનો આ વિશ્વમાં નથી કોઈનો રહ્યો ઈજારો 

બુદ્ધુ ને બુદ્ધિજીવી પડ્યા છે અહીં સેંકડો હજારો

અને વળી એક એકની ચણાઈ ગઈ છે મજારો,

શૂન્ય ને એક વચ્ચે જ એ કંઈ નથી સમાતી 

મારગ વચ્ચે પણ એ આમ તો ઘણું કમાતી 

જિંદગી કાંઈ મફતમાં એમ જ નથી પમાતી.