જાદુગર (બાળગીત)

(રાગ : નાની મારી આંખ, એ જોતી કાંક કાંક)

જાદુગરના હાથ, કરામતમાં આપે સાથ,

        એતો જાદુના ખેલ કેવા કરે છે !

હાથ વીંઝે લાકડી, પેટીમાંથી કાઢે માંકડી,

        એતો લોકોનાં મન કેવાં હરે છે !

હાથમાં લઈ સૂતર, બનાવી દે કબૂતર,

        ત્યાં તો નકલી ફૂલ કેવાં ખીલે છે !

મોટું કરે રહસ્ય, થઈ જાય એ અદૃશ્ય,

        એની કળાને લોકો કેવા ઝીલે છે !

એવો મંત્ર ભાખે, માણસને ઊંચો રાખે,

        એતો દોરી ઉપર કેવા ચડે છે !

ખેલ બતાવે ઝાઝા, ચહેરા કરી દે તાજા,

        ત્યાં તો લોકોની તાળી કેવી પડે છે !