હુંપતંગનેતુંદોરી

પ્રણયના વ્યોમમાં વિહરવું ગમે છોરી,

હું પતંગ ને તું દોરી;

છેડા-છેડી જેવી કિન્ના બાંધી છે ગોરી,

હું પતંગ ને તું દોરી.

પાડી ગૂંચ લપેટે છે કોણ આ ફીરકી,

હું પતંગ ને તું દોરી;

કાપી આ લંગસીયા રહેજે તું ઓરી,

હું પતંગ ને તું દોરી.

ઉડું ગગનમાં વગર હવા જો તું થા ઢીલી,

હું પતંગ ને તું દોરી;

લોટણીયાઓથી દૂર ઉંચે જઉં હું છટકી,

હું પતંગ ને તું દોરી.

એક ઠૂમકે જવા ઉપર પૂંછ છે જો લગાવી,

હું પતંગ ને તું દોરી;

જોજે કમાન તોડતી પચરંગી બીજો ભાળી,

હું પતંગ ને તું દોરી.

લાંબો જો પેચ છોડાવું લોટણ થઈ માથું મારી,

હું પતંગ ને તું દોરી;

છેલ્લે આવ્યો વારો કપાવાનો બીજાં બહુ કાપી,

હું પતંગ ને તું દોરી.

કપાયો- હરખપદૂડી બીજી કેટલી દોરીઓ ઘસી,

હું પતંગ ને તું દોરી;

છેલ્લે હવા સ્મશાનમાં ગઈ ખેંચી ,ગયાં પોઢી,

હું પતંગ ને તું દોરી !